امریکی صدر ڈونلڈ ٹرمپ نے آئندہ سال چین کا دورہ کرنے کا اعلان کردیا۔
امریکی صدر نے چینی ہم منصب سے ملاقات کے بعد ایک بیان میں کہا کہ اُن کی شی جن پنگ سے فون پر اچھی اور تعمیری بات چیت ہوئی۔
صدر ٹرمپ نے بتایا کہ شی جن پنگ نے انہیں چین کے دورے کی دعوت دی جو انہوں نے قبول کرلی اور وہ اپریل میں چین کا دورہ کریں گے۔
ڈونلڈ ٹرمپ نے یہ بھی بتایا کہ اس دعوت نامے کے جواب میں انہوں نے بھی شی جن پنگ کو امریکا کے دورے کی دعوت دی، جسے چینی صدر نے قبول کر لیا ہے۔ ٹرمپ کا کہنا تھا کہ چینی صدر آئندہ سال امریکا کا سرکاری دورہ کریں گے۔
اس سے قبل امریکی صدر نے چینی ہم منصب سے ٹیلیفونک بات چیت کے بعد ایک بیان میں دونوں ممالک کے تعلقات کو مضبوط قرار دیا اور کہا کہ ان کی چینی صدر سے یوکرین جنگ، تائیوان ، اور سویا بین کی خریداری پر بات ہوئی۔
چینی میڈیا کے مطابق صدر شی جن پنگ نے تائیوان کے مسئلے پرچین کا مؤقف واضح کرتے ہوئے ڈونلڈ ٹرمپ سے کہا کہ تائیوان کی چین کے پاس واپسی جنگ کے بعد کے بین الاقوامی نظام(پوسٹ وار انٹرنیشنل آرڈر)کا اہم حصہ ہے۔
