کراچی میں غیر قانونی طور پر مقیم افغان باشندوں کیخلاف آپریشن کے دوران نامعلوم افراد کے پتھراؤ سے 3 پولیس اہلکار زخمی ہوگئے جنہیں طبی امداد کیلیے اسپتال منتقل کردیا گیا۔
اے آر وائی نیوز کی رپورٹ کے مطابق کراچی کے علاقے سہراب گوٹھ میں غیر قانونی مقیم افغان باشندوں کے خلاف پولیس کا آپریشن اجری تھا کہ جمالی پل کے قریب نامعلوم مشتعل افراد نے پولیس اہلکاروں پر اچانک ڈنڈوں سے حملہ کر دیا، مشتعل افراد کی جانب سے حملے کے باعث پولیس موبائل کو بھی نقصان پہنچا۔
اس موقع پر آپریشن کیلیے جانے والے پولیس اہلکار اپنی جان بچاتے ہوئے موبائل وین چھوڑ کر فرار ہوگئے، مشتعل افراد نے پولیس موبائل پر پتھراؤ کے بعد ڈنڈوں سے توڑ پھوڑ شروع کردی۔
مکینوں کے پتھراؤ سے 2 سے 3 پولیس اہلکاروں کے زخمی ہونے کی بھی اطلاعات ہیں، مذکورہ علاقے میں غیرقانونی مقیم افغان باشندوں کے خلاف پولیس کا آپریشن جاری تھا۔
نامعلوم افراد نے اپنے زیرحراست افغان باشندوں کو چھڑانے کی کوشش کی، نامعلوم افراد نے پولیس حکام سے تلخ کلامی اور ہاتھا پائی کی اور پتھراؤ بھی کیا۔
پولیس حکام کا کہنا ہے کہ پتھراؤ کے باعث ایک پولیس موبائل کو نقصان پہنچا ہے، تاہم اب صورتحال کافی حد تک قابو میں ہے کچھ افراد کو حراست میں بھی لے لیا گیا ہے، آخری اطلاعات تک پولیس کی جانب سے علاقے میں سرچ آپریشن جاری تھا۔
